МАН-ын бүлэг Б.Батзоригийг огцруулах тогтоолыг дэмжинэ
МОНГОЛЫН МЭДЭЭ | УЛС ТӨРУлаанбаатар /МОНЦАМЭ/. УИХ дахь МАН-ын бүлгийн өнөөдрийн хуралдаанаар ХХААХҮ-ийн сайдыг огцруулах асуудлыг хэлэлцсэн байна. Энэ талаар тус бүлгийн дарга Д.Хаянхярваа мэдээлэл хийв.
Тэрбээр, "Засгийн газраас өнөөдөр ХХААХҮ-ийн сайд Б.Батзоригийг огцруулах
тухай тогтоолын төслийг УИХ-ын даргад өргөн барьсан. Уг асуудлыг өнөөдөр
бүлгийн хуралдаанаар хэлэлцэж, дэмжсэн” хэмээв.
Мэдээллийн дараа тэрбээр сэтгүүлчдийн сонирхсон асуултад хариулав.
-Прокурорын байгууллагаас Б.Батзоригийг УИХ-ын гишүүнээс түдгэлзүүлэх саналыг УИХ-ын даргад хүргүүлсэн тухай мэдээлэл гарсан. Энэ талаар?
-Манай бүлэгт албан бичиг нь хараахан ирээгүй байна. Тиймээс энэ асуудлыг
маргааш хэлэлцэнэ.
-ХХААХҮ-ийн сайдаар ажиллах
дараагийн хүний нэр тодорсон уу?
-Энэ асуудлыг хэлэлцээгүй.
-ЖДҮХС-гаас зээл авсан УИХ-ын гишүүд
мөнгөө төлж эхэлсэн үү?
-Өнгөрсөн 7 хоногийн бүлгийн хуралдаанаас зээл авсан гишүүдэд нэн даруй
эгүүлэн төлөх чиглэл өгсөн. Одоогоор Ж.Энхбаяр гишүүн зээлээ төлсөн тухай
мэдээлэл олон нийтийн сүлжээнд тавьсан байна.