Маршал Ю.Цэдэнбалын хөшөө Орхон аймагт сүндэрлэлээ

Орон нутагт | Орхон
orkhon@montsame.mn
2018-12-14 18:17:58
oyuka_hu@yahoo.com

Орхон/МОНЦАМЭ/ “Эрдэнэт үйлдвэр” ХХК-ийн эхний ээлж ашиглалтад орсон энэхүү түүхэн өдөр Монгол Улсын баатар, Хөдөлмөрийн баатар, төр нийгмийн нэрт зүтгэлтэн, Маршал Юмжаагийн Цэдэнбалын хөшөөг “Эрдэнэт үйлдвэр”-ийн Ерөнхий захиргааны хоёрдугаар байрын өмнө босголоо. 

“Эрдэнэт үйлдвэр”, Эрдэнэт хотыг цогцоор нь барьж байгуулах түүхэн шийдвэрийг гаргасан түүний энэ гавъяаг хүндэтгэн тус үйлдвэр, Ю.Цэдэнбал академи, Увс нутгийн зөвлөлтэй  хамтран уг хөшөөг бүтээжээ.

Хөшөөний нээлтэд “Эрдэнэт үйлдвэр” ХХК-ийн Ерөнхий захирал Х.Бадамсүрэн, аймгийн Засаг дарга Д.Батлут, Ю.Цэдэнбал агсаны дүү Ю.Жавзан болон Ю.Цэдэнбал академи, Увс нутгийн зөвлөлийн төлөөлөгчид оролцлоо.

Хөшөөг нээх ёслолын үеэр аймгийн Засаг дарга Д.Батлут, “Эрдэнэт үйлдвэр”, Эрдэнэт хот байгуулагдах түүхэн шийдвэр, түүхэн үйл явдал бүхэн төр, нийгмийн нэрт зүтгэлтэн Юмжаагийн Цэдэнбалтай салшгүй холбоотой бөгөөд тухайн үед Эрдэнэт үйлдвэрийг барьж байгуулах үйл явцтай Маршал  Ю.Цэдэнбал дөрвөн  удаа танилцаж байсан” хэмээн түүний байгуулсан гавъяаг тодотгосон юм.

Дашрамд дурдахад, Монгол Улсын Засгийн газрын 2016 оны 9 дүгээр сарын 21-ны 94 дүгээр тогтоолоор “Эрдэнэт үйлдвэр” ХХК-ийг  Юмжаагийн Цэдэнбалын нэрэмжит болгосон билээ.

 

 

Холбоотой мэдээ