Авлигын эсрэг НҮБ-ын конвенцын хэрэгжилтийг үнэлэх бүлгийн уулзалтад илтгэл хэлэлцүүлэв

Монголын мэдээ | Хууль
ariunbold@montsame.mn
2021-06-18 12:44:58

Улаанбаатар /МОНЦАМЭ/. Авлигын эсрэг НҮБ-ын конвенцын “Хэрэгжилтийг үнэлэх бүлэг”-ийн 12 дугаар удаагийн уулзалт энэ сарын 14-18-нд Австри Улсын Вена хотноо болж байна.


Дэлхийн улс орнуудын удирдагч нар 2003 оны 12 дугаар сарын 9-нд Мексик Улсын Мерида хотноо НҮБ-ын Авлигын эсрэг конвенцыг баталснаас хойш өдгөө 187 улс нэгдэн ороод байна. 


Нэгдэн орсон улсууд дотоодын хууль тогтоомжоо конвенцын үзэл санаа, зүйл заалтуудад нийцүүлэн, хэрэгжүүлж, ажиллах үүрэг хүлээдэг. Ингэснээр авлига хэмээх дэлхий нийтийг хамарсан асуудлын талаар нэгдсэн ойлголт, эрх зүйн орчинтой болох, авлигын гэмт хэрэг мөрдөн шалгах, хөрөнгө буцаах чиглэлээр хамтран ажиллах боломжийг нэмэх зорилготой юм.  


Энэ удаагийн уулзалтын үеэр конвенцын Хуулийн этгээдийн хариуцлагын тухай 26 дугаар зүйл  болон Яллах, шүүхийн шийдвэр гаргах, шийтгэл оногдуулах тухай 30 дугаар зүйлийг тус тус дотоодын хууль тогтоомждоо тусган, хэрэгжүүлж буй сайн туршлагын талаар хуваалцах сэдэвчилсэн хэлэлцүүлэг зохион байгуулагдаж, Авлигатай тэмцэх газрын төлөөлөл оролцлоо.  


НҮБ-ын Мансууруулах бодис, гэмт хэрэгтэй тэмцэх албанаас манай улсын Хуулийн этгээдэд хариуцлага оногдуулах эрх зүйн орчин, хэрэгжилтийг олон улсын хэмжээнд сайн туршлага  хэмээн үзэж, илтгэл тавихыг урьснаар, Авлигатай тэмцэх газрын Гадаад харилцааны асуудал хариуцсан ажилтан, комиссар Ж.Болорчимэг илтгэл хэлэлцүүллээ.


Монгол Улс нь 2015 онд шинэчлэн баталсан Эрүүгийн хуульдаа Авлигын эсрэг НҮБ-ын конвенцын Гэмт хэрэгт тооцох, хууль сахиулах тухай 3 дугаар бүлэгт заасан бүх гэмт хэргийг тусган баталсны нэг нь Хуулийн этгээдэд эрүүгийн хариуцлага хүлээлгэх зохицуулалт юм. Үүнд байгаль орчин, мөнгө угаах, терроризм, хахууль өгөх зэрэг 31 төрлийн гэмт хэрэгт хуулийн этгээдэд хариуцлага хүлээлгэх зохицуулалттай.   

   

Д.Урансолонго

Холбоотой мэдээ