Мэнэнгийн талд анхны бага сургууль байгууллаа

Орон нутагт | Дорнод
167@montsame.mn
2021-10-12 20:57:23

Дорнод /МОНЦАМЭ/. Мэнэнгийн талд анхны ЕБС үүдээ нээж, хичээл сургалтаа эхлүүллээ. Дорнод аймгийн Орон нутгийн хөгжлийн сан, сумын ОНХС-гаас нийт 120 сая төгрөгийн хөрөнгө оруулалт хийж, Матад сумын Мэнэн багт энэхүү сургуулийг байгуулсан байна.

Тус сургууль нь 1-5 дугаар ангийн 125 хүүхдийн хүчин чадалтай, боловсон ариун цэврийн байгууламжтай бага сургууль юм. Одоогоор Мэнэн багийн малчид, Мэнэнгийн отрядын офицер, ахлагчдын 30 гаруй хүүхэд суралцахаар бүртгүүлээд байна. Мөн шинэ сургуулийг дагаад Мэнэн багт 12 ажлын байр бий болжээ.

Өмнө нь тус багийн хүүхдүүд сургуульд сурахаар сум болон аймгийн төвд гэрээсээ хол дотуур байранд эсвэл айлд амьдардаг, зарим нь ээжтэйгээ цуг сум, аймгийн төвийг барааддаг байсан. Харин одоо багийн хүүхдүүд гэрээсээ сургуульдаа явж, хилчдийн хүүхдүүд аав, ээжтэйгээ хамт амьдарч, суралцах боломжийг ийнхүү бүрдүүллээ.

Дорнод аймаг цаашид уул уурхай, газрын тосны орд орчимд бага сургууль, цэцэрлэг байгуулахаар төлөвлөөд байна.

 

Холбоотой мэдээ