Улаанбаатар
НЗД-ын нэгдүгээр орлогчоор Н.Мандуулыг томиллоо
МОНГОЛЫН МЭДЭЭ | НИЙГЭМ
Улаанбаатар, 2024 оны долоодугаар сарын 3 /МОНЦАМЭ/. Нийслэлийн Засаг дарга бөгөөд Улаанбаатар хотын захирагч Х.Нямбаатар Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогчоор Санхүү, дэд бүтцийн хөрөнгө оруулалтын асуудал хариуцсан зөвлөх Н.Мандуулыг томилов.
Засаг захиргаа, нутаг дэвсгэрийн нэгж түүний удирдлагын тухай хуулийн дагуу Нийслэлийн Засаг дарга хоёр орлогчтой ажиллана. УИХ-ын 2024 оны ээлжит сонгуулиар НЗД-ын хоёр орлогч сонгуульд өрсөлдөж, гишүүн болсон билээ.
Н.Мандуул нь 2000 онд ерөнхий боловсролын нэгдүгээр
сургууль, 2007 онд Соросын сангийн тэтгэлгээр Болгар дахь Америкийн их
сургуулийг Бизнесийн удирдлагын бакалавр, 2014 онд АНУ-ийн Засгийн газрын
Фүлбрайтын тэтгэлгээр АНУ-ын Брэндайзын их сургуулийг Бизнесийн удирдлагын
магистраар төгссөн, англи, орос хэлтэй.
Тэрбээр,
2007-2008 онд Дэлхийн банкны Засаглалыг дэмжих төслийн
дотоодын зөвлөх,
2008-2012 онд Сангийн яамны Төсвийн бодлогын газарт
мэргэжилтэн, хэлтсийн дарга,
2013-2014 онд IHS, Consulting group, АНУ, Санхүүгийн
шинжээч,
2014-2018 онд Сангийн яамны Санхүүгийн бодлогын газарт
хэлтсийн дарга,
2019-2020 онд “Эрдэнэс Тавантолгой Майнинг” ХХК-ийн Тэргүүн
дэд захирал,
2020-2021 онд “Эрдэнэс Монгол” ХХК-ийн Дэд бүтэц хариуцсан
захирал,
2021 онд Сангийн яамны Санхүүгийн бодлогын газрын дарга,
2021-2023 онд Хөгжлийн банкны гүйцэтгэх захирал,
2023 онд ШӨХТГ-ын дарга, ONDO Holding-ийн ерөнхийлөгч,
2024 оны дөрөвдүгээр сараас нийслэлийн Засаг дарга бөгөөд
Улаанбаатар хотын Захирагчийн Санхүү, дэд бүтцийн хөрөнгө оруулалтын асуудал
хариуцсан зөвлөхөөр ажиллаж байсан юм.
Н.Мандуул нь Сангийн яаманд ажиллахдаа Засгийн газрын
Мазаалай, Хуралдай, Дим сам, Гэрэгэ,
“Century” зэрэг бондыг олон улсын зах зээлд арилжаалах ажлыг удирдаж, Хөгжлийн банкны гүйцэтгэх
захирлаар ажиллах үедээ тус банкны найдваргүй 1.3 их наяд төгрөгийн зээлийг эргэн төлүүлж, санхүүгийн нөхцөл
байдлыг сайжруулж байсан туршлагатай.
