Ulaanbaatar
Донецк Европ, Ойрхи Дорнодод нүүрс нийлүүлнэ
ДЭЛХИЙН МЭДЭЭ | ЭДИЙН ЗАСАГМОСКВА. /TASS/. Европ болон Ойрхи Дорнодын орнуудод нүүрс экспортлох асуудлыг хэлэлцэж байна гэж өөрийгөө зарлан тунхагласан Бүгд Найрамдах Донецк Ард Улсын тэргүүн Александр Захарченко мэдэгдэв.
“Донецкийн Нүүрсний яам шинэ зах зээл хайж байна. Бид нэг л үйлчлүүлэгчтэй /Украин/ байж болохгүй. Тиймээс бид Европ, Ойрхи Дорнодод нүүрс нийлүүлэх асуудлыг хэлэлцэж байна” гэж тэрбээр мэдэгджээ.
“Бид тэтгэвэр, цалин олгож байгаа бөгөөд бидэнд мөнгөний эх үүсвэр хэрэгтэй. Нүүрс нь төсвийг бүрдүүлэх орлогын эх үүсвэр юм. Тиймээс бид нүүрсээ худалдах хэрэгтэй. Ингэснээр ажлын байр бий болж, уурхайчдын ар гэрийн аж амьдрал сайн байна. Мөн уурхайн ажил өрнөж, олборлолт хийгдэхэд шаардлагатай байгууламжууд баригдана” гэж тэрбээр мэдэгдсэн байна.
Украин руу хийх нүүрсний нийлүүлэлтээ Донецк энэ сарын 10-наас эхлэн үргэлжлүүлсэн бөгөөд өдөрт 15 мянган тонн хүртэлх нүүрсийг нийлүүлэхээр төлөвлөжээ.
Д.Нямтулга
