Уянга сумаас алт олборлох явцад хирсний толгой олджээ

Орон нутагт | Өвөрхангай
erdenechimeg@montsame.mn
2015-12-19 21:52:35

Өвөрхангай аймгийн Уянга суманд алт олборлолтын үйл ажиллагаа явуулж байсан Баярсгоулд ХХК-ийн уурхайн талбайгаас 2015 оны 10 дугаар сарын 06-ны өдөр  соёлын биет өв ба эртний сүүн тэжээлт амьтан болох “Савагт хирс”-ны 84 см урттай толгойн яс олдсон билээ.

Энэхүү олдворыг аймгийн МХГ-аас ШУА-ийн Палеонтелоги, Геологийн хүрээлэн рүү шилжүүлсэн бөгөөд хүрээлэнгээс хайгуул судалгааны ажлыг зохион байгуулж, эртний хөхтөн амьтдын толгой, мөч, хөлийн тавхай зэрэг биеийн хэсгүүд, чулуужсан яс, эртний ургамлын үлдэгдлүүдийг илрүүлжээ. Дөрөвдөгч галавын амьтдын чулуужсан яс, олдвор байх нөөц бололцооны талаар судлахад хурдсын дээд хэсэг шар шаврын багц үеүдэд байж болох боломжтой хэмээн дүгнэсэн байна. Тиймээс уул уурхайн компани, хууль бусаар алт олборлогчдын санамсаргүй үйл ажиллагааны явцад хурдаст хадгалагдаж байгаа олдворууд сүйтгэгдэх магадлалтай байгааг анхаарч ажиллахыг Палеонтелоги, Геологийн хүрээлэнгээс анхааруулж байгаа юм.

Мөн уул уурхайн олборлолтын явцад эртний амьтан, ургамлын олдвор, үлдвэр илэрсэн тохиолдолд ШУА-ийн Палеонтелоги, Геологийн хүрээлэнд хандахыг санал болгож байна.

Б.Батчимэг

 

Холбоотой мэдээ