БНХАУ-ын Худалдааны сайд Жун Шаньтай уулзлаа

Хилийн чанадаас
khandmaa@montsame.gov.mn
2019-04-02 21:27:27


 Бээжин /МОНЦАМЭ/. Гадаад харилцааны сайд Д.Цогтбаатар БНХАУ-ын Төрийн Зөвлөлийн гишүүн, Гадаад хэргийн сайд Ван Игийн урилгаар БНХАУ-д хийж буй албан ёсны айлчлалынхаа хүрээнд, тус улсын Худалдааны сайд Жун Шаньтай уулзав. Уулзалтаар хоёр талын худалдаа, эдийн засгийн хамтын ажиллагааг хөгжүүлэх өргөн хүрээний олон чухал асуудлаар санал солилцов.


Уулзалтын үеэр Д.Цогтбаатар сайд хэлэхдээ, “БНХАУ-д хийж буй энэ удаагийн айлчлал нь Монгол Улсын Ерөнхийлөгчийн БНХАУ-д хийх төрийн айлчлалын бэлтгэлийг хангах, худалдаа, эдийн засгийн хамтын ажиллагаанд бодит ахиц гаргах зорилготой юм. Энэ жилийн хувьд, хоёр улсын хооронд дипломат харилцаа тогтоосны 70 жилийн ой, Монгол, Хятадын найрсаг харилцаа, хамтын ажиллагааны гэрээг шинэчлэн  байгуулсны 25 жилийн ой тус тус тохиож буй онцлог жил болж байна. Бидний найрамдалт харилцааны түүх БНХАУ-тай нас чацуу. Шинэ Хятад улс байгуулагдахад хамгийн түрүүнд хүлээн зөвшөөрсөн таван орны нэг нь Монгол Улс байсан. Манай хоёр орны иж бүрэн стратегийн түншлэлийн харилцаа бүрэн утгаараа амжилттай хөгжих ёстой” хэмээв. 

Тэрээр, 2018 онд хоёр талын харилцаа, хамтын ажиллагаа ололт, амжилтаар дүүрэн байсныг тэмдэглэж, 2019 онд улам бататган шинэ шат ахиулах нь зүйтэйг онцоллоо. Мөн цаашид хоёр талын худалдааны хэмжээг 10 тэрбум ам.долларт хүргэх зорилтыг хангахад ойрхон байгаа бөгөөд гагцхүү худалдааны эргэлтийг нэмэгдүүлэхийн тулд хориг саадыг багасгах, шинэ суваг, платформыг нээх хамтын ажиллагааны эрх зүйн үндсийг бэхжүүлэхэд анхаарч ажиллах ёстойг илэрхийлэв.


Мөн “Хөгжлийн зам” Үндэсний хөтөлбөрийг “Бүс ба зам” санаачлагатай уялдуулах тухай Засгийн газар хоорондын харилцан ойлголцлын Санамж бичиг байгуулах, Монгол Улс-ОХУ-БНХАУ-ыг холбосон эдийн засгийн коридор байгуулах хөтөлбөрийн хүрээнд судалгааны ажлыг эрчимжүүлэх,  худалдаа, эдийн засгийн хамтын ажиллагааг хөгжүүлэх дунд хугацааны хөтөлбөрийг шинэчлэн байгуулах, БНХАУ-ын зүгээс олгож буй буцалтгүй тусламж, хөнгөлөлттэй зээлийн төслүүдийн хэрэгжилтийг түргэтгэх, Монгол, Хятадын хилийн зарим боомтуудын ажиллах цагийг уртасгах, зэрэглэл, статусыг дээшлүүлэх, баруун бүсээс мах, махан бүтээгдэхүүн, зүүн бүсээс хөх тариа, улаан буудайн гурилыг БНХАУ-д экспортлох боломжийг нэмэгдүүлэх, БНХАУ-д зохиож буй олон улсын үзэсгэлэн яармагт Монголын аж ахуйн нэгжүүдийг өргөнөөр оролцуулах, шаардлагатай хөнгөлөлт дэмжлэг үзүүлэх чиглэлээр хамтарч ажиллах зэрэг саналыг дэвшүүлэв.


БНХАУ-ын Худалдааны сайд Жун Шань хэлэхдээ, “Хоёр талын найрамдалт харилцаа, худалдаа, эдийн засгийн хамтын ажиллагааны өнөөгийн түвшинд Д.Цогтбаатар сайдын зүгээс өгч буй үнэлэлт дүгнэлттэй санал нэгтэй байгаагаа илэрхийлж, хоёр орны харилцаа хамтын ажиллагаа улам урагшлан хөгжих хамгийн таатай үе тохиож байгааг тэмдэглэв.



Мөн дипломат харилцаа тогтоосны 70 жилийн ойг тэмдэглэх ажлын хүрээнд, хоёр тал үр ашигтай олон ажлыг амжилттай зохион байгуулна гэдэгт итгэлтэй байгаа бөгөөд энэ удаагийн уулзалтаар Монголын талаас тавьж буй санал санаачлагыг хүлээн авч, бодит ажил хэрэг болгох чиглэлээр холбогдох байгууллага, газруудтай хамтран ажиллаж, дээд түвшний айлчлал, яриа хэлэлцээний үеэр тодорхой ахиц гаргаж, нэгдсэн тохиролцоонд хүрэхийн төлөө ажиллахаа илэрхийлэв.

А.Анхбаяр

 

 

 

Холбоотой мэдээ