Улаанбаатар
Шивээхүрэн боомтоор нүүрс экспортлоход бэлэн болжээ
МОНГОЛЫН МЭДЭЭ | ЭДИЙН ЗАСАГ
Улаанбаатар /МОНЦАМЭ/. УОК-ын шийдвэрээр гуравдугаар сарын 15-наас нүүрсний экспортыг эхлүүлэхээр болсонтой холбогдуулан УУХҮ-ийн дэд сайд Д.Загджав Шивээхүрэн боомтод ажиллаж байна. Тус боомтоор уул уурхайн бүтээгдэхүүнийг онцгой нөхцөлд тээвэрлэх бэлтгэл ажил хангагдсан гэж албаныхан үзжээ.
Өмнөговь аймгийн Шивээхүрэн боомтоор хорио цээрийн дэглэмийн үед өдөрт 200 машин гаргах боломжийг бүрдүүлсэн тухай тус боомтын захиргааны дарга, Хилийн цэргийн 0166 дугаар ангийн захирагч Б. Мөнхбат мэдээлсэн байна.
Дэд сайд Д.Загджав өдөрт 200 тээврийн хэрэгсэлд ариутгал хийх хүчин чадалтай түр байгууламж байгуулахыг аймгийн онцгой комисст үүрэг болгожээ. Ингэхдээ нэг тээврийн хэрэгсэлд 10 литр ус зарцуулахаар тооцоолж байгаа бөгөөд тээврийн хэрэгслийг ариутгасны дараа гаалийн болон мэргэжлийн хяналтын үзлэг шалгалт хийгдэх аж.
Ариутгалын түр байгууламж барихад шаардлагатай 100-170 сая төгрөгийг Нарийнсухайтын ордод үйл ажиллагаа явуулж буй дөрвөн ААН гаргах юм байна.
