Монголбанк Казахстаны Үндэсний банктай хамтын ажиллагааны санамж бичиг байгуулав
МОНГОЛЫН МЭДЭЭ | ЭДИЙН ЗАСАГ
Улаанбаатар, 2026 оны дөрөвдүгээр сарын 21 /МОНЦАМЭ/. Монгол Улсын Ерөнхийлөгч У.Хүрэлсүхийн Бүгд Найрамдах Казахстан Улсад хийж буй төрийн айлчлалын хүрээнд өнөөдөр Монголбанк болон Бүгд Найрамдах Казахстан Улсын Үндэсний банк хооронд хамтын ажиллагааны санамж бичиг байгууллаа.
Тус санамж бичиг нь хоёр улсын төв банкнуудын хамтын ажиллагааг бэхжүүлэх, мөнгөний бодлого, санхүүгийн тогтвортой байдал, банк, санхүүгийн зах зээлийн хөгжилтэй холбоотой мэдээлэл солилцох, туршлага хуваалцах урт хугацааны хамтын ажиллагааны суурийг тавилаа. Хамтын ажиллагааны хүрээнд талууд удирдлагын түвшинд харилцан зөвлөлдөх, мэргэжилтэн солилцох, сургалт хийх, мөн харилцан тохиролцсон сэдвүүдээр хамтарсан судалгааны ажил хийх боломж бүрдэж байна.
Энэхүү санамж бичиг нь Монгол Улс болон Бүгд Найрамдах Казахстан Улсын банк, санхүүгийн салбар дахь харилцан итгэлцлийг гүнзгийрүүлэхийн зэрэгцээ бүс нутгийн түвшинд санхүүгийн хамтын ажиллагааг өргөжүүлэхэд чухал ач холбогдолтой юм.
Монголбанк цаашид олон улсын болон бүс нутгийн төв баннкуудтай хамтын ажиллагаагаа идэвхтэй өргөжүүлж, санхүүгийн тогтвортой байдлыг бэхжүүлэхэд чиглэсэн ажлуудыг тууштай үргэлжлүүлэн хэрэгжүүлэх болно.
Монгол Улс, Бүгд Найрамдах Казахстан Улсын төв банкнууд 1992 онд байгуулсан худалдаа, эдийн засгийн гүйлгээний тооцоо, данс хөтлөх журмын хүрээнд тасралтгүй хамтран ажиллаж ирсэн бөгөөд энэхүү санамж бичиг нь хамтын ажиллагааг шинэ шатанд гаргаж байна.
