Монгол Улс, ЮНЕСКО-гийн Хамтын ажиллагааны санамж бичгийг шинэчилнэ

Монголын мэдээ | ГХЯ-ны мэдээ
ariunbold@montsame.mn
2022-01-20 16:41:00

Улаанбаатар /МОНЦАМЭ/. НҮБ-ын Боловсрол, шинжлэх ухаан, соёлын байгууллага /ЮНЕСКО/-гийн Монголын үндэсний комисс /МҮК/-ын 2021 оны тайлангийн хурал өнөөдөр цахимаар болов.


Гадаад харилцааны сайд, ЮНЕСКО-гийн Монголын Үндэсний комиссын дарга Б.Батцэцэг хурлыг нээж үг хэлэхдээ боловсрол, шинжлэх ухаан, соёл, мэдээлэл, харилцаа холбоо зэрэг үндсэн 5 салбарын хүрээнд 2021 онд комиссоос хэрэгжүүлсэн томоохон ажлыг танилцуулж, 2022 оныг Монгол Улс, ЮНЕСКО-гийн хамтын ажиллагааг шинэ түвшинд хүргэх, бодит үр дүн гаргах чухал жил хэмээн онцлон тэмдэглэв.


ЮНЕСКО-гийн стратеги, бодлогын баримт бичиг шинэчлэгдсэнтэй холбогдуулан “Монгол Улсын Засгийн Газар болон ЮНЕСКО-гийн Хамтын ажиллагааны тухай санамж бичиг”-ийг шинэчлэх, хэрэгжүүлэхэд комиссын гишүүдийг идэвхтэй оролцож, нягт хамтран ажиллахыг Гадаад харилцааны сайд Б.Батцэцэг үүрэг болгов.


Тайлангийн хурлын үеэр ЮНЕСКО-гийн Монголын үндэсний комиссын Ерөнхий нарийн бичгийн дарга С.Болдсайхан тус комиссын 2021 оны гүйцэтгэлийн төлөвлөгөөний биелэлтийг танилцуулсан ба 2022 оны гүйцэтгэлийн төлөвлөгөөний төсөлд комиссын гишүүд саналаа илэрхийлж, эцэслэн батлахаар тогтов.

Холбоотой мэдээ