Улаанбаатар
Гүйлтийн цанын хоёр тамирчин 2026 оны өвлийн олимпод оролцох болзол хангажээ
МОНГОЛЫН МЭДЭЭ | СПОРТ
Улаанбаатар, 2025 оны тавдугаар сарын 30 /МОНЦАМЭ/. Олон улсын олимпын хорооны Эв санааны нэгдлээс “Милан Кортина-2026” өвлийн олимпын наадамд оролцох тамирчдад эрхээ авахад нь дэмжлэг үзүүлэх, тэдний өрсөлдөөнийг нэмэх зорилгоор урт хугацааны хөрөнгө оруулалт болгон тэтгэлэгт хөтөлбөрт хамруулж буй.
Тус хөтөлбөрт хамрагдаж буй тамирчид, дасгалжуулагч, холбооны төлөөллийг ОУОХ-ны гишүүн, МҮОХ-ны ерөнхийлөгч Б.Баттүшиг, МҮОХ-ны ерөнхий нарийн бичгийн дарга Э.Бадар-Ууган нар “Олимпик хаус”-т хүлээн авч уулзан, тэтгэлэг гардуулж бэлтгэл сургуулилалтын явц, олимпын эрхийн тэмцээнүүдэд хэрхэн оролцох талаар мэдээлэл солилцсон байна.
2026 оны оны хоёрдугаар сарын 22-ныг хүртэлх хугацаанд хүртэлх хугацаанд хамрагдах энэхүү тэтгэлгийг гүйлтийн цанын тамирчин Б.Ачбадрах, О.Золбаяр, Т.Ариунболд, тэшүүрийн шорт трэйкийн тамирчин Б.Гэрэлтуяа нар авч байгаа юм. Тэднээс гүйлтийн цанын хоёр тамирчин олимпын эрхийн болзол хангасан бөгөөд дахин хоёр тамирчныг оролцуулах боломжийг судалж байгаа аж. Ингэхдээ уулын цанын төрөлд дэмжлэг үзүүлбэл эрх авах боломжтой онцолжээ. Эрхээ өвөртөлсөн хоёр цаначин ирэх долоодугаар сард роликтой цанын тэмцээнд оролцох юм.
Харин тэшүүрийн
тамирчид ирэх сараас Солонгост хамтарсан бэлтгэлд оролцож, улмаар аравдугаар
сараас дэлхийн цомын олимпын эрхийн оноо олгох дөрвөн цуврал тэмцээнд өрсөлдөх
ажээ.
