Улаанбаатар
Эрүүл мэндийн байгууллагууд зам тээврийн ослын эсрэг нэгдлээ
ОРОН НУТГИЙН МЭДЭЭ | ХӨВСГӨЛ
Хөвсгөл /МОНЦАМЭ/. Хөвсгөл аймгийн Эрүүл мэндийн газраас хүүхдийг зам тээврийн ослоос урьдчилан сэргийлэх ард иргэд, жолооч нарт сэрэмжлүүлэг хүргэх үйл ажиллагааг "Авто ослоор алаг үрсээ алдсаар байх уу" уриан дор аймгийн хэмжээнд зохион байгууллаа.
Тус арга хэмжээг сум бүрийн Эрүүл мэндийн төв орон нутагтаа хийсэн бол Мөрөн суманд Өрхийн эрүүл мэндийн төвүүд харьяа багуудад сурталчилгаа мэдээлэл өгөв. Аймгийн Эрүүл мэндийн газар, Нэгдсэн эмнэлэг, ЗӨСТ-ийн бүх ажилтан албан хаагчид болон Оюу-Ундраа хувийн эмнэлэг, өрхийн эрүүл мэндийн төвүүд болон нийт 8 байгууллагын 350 орчим эмч мэргэжилтэн албан хаагчид, төрийн байгууллагуудын эрүүл мэндийн сайн дурын ажилтан нар тус өдөрлөгт нэгдэн оролцлоо.
Зам тээврийн осол сүүлийн жилүүдэд
нэмэгдсээр байгаа бөгөөд өнгөрсөн онд аймгийн хэмжээнд 128 нас баралт
бүртгэгдсэнээс 25 нь зам тээврийн шалтгаант ослоор нас баржээ. Мөн 1378 осол
гэмтэл, гадны шалтгаант өвчлөл бүртгэгдсэнээс 397 нь зам тээврийн осол байсан
ажээ.
