Сэкиваке Тэрүнофүжи маргааш Озэки Шодайтай барилдана
МОНГОЛЫН МЭДЭЭ | СПОРТУлаанбаатар /МОНЦАМЭ/. Токио хотын Рёогокү
Кокүгикан ордонд болж буй мэргэжлийн сумо бөхийн Хацү башёгийн 13 дахь өдрийн
барилдааны дараа Дайэйшёо /М-1/ 11 даваатай болж, Озэки Шодайгийн хамт башёг
тэргүүлж байна.
Тэрбээр, энэ өдөр Рюүдэн
/М-6/-тэй барилдан, түүнийг ошидаши мэхээр хаяж 11 даваа, 2 унаатай болсноор,
өнөөдөр даваагаа ахиулсан Озэки Шодайтай унаа, даваа тэнцүү явна.
Хацү башёг тэргүүлэгч энэ
2 бөхийн ард Озэки Асанояама, Сэкиваке Тэрүнофүжи, Ичиножёо /М-12/, Котоновака
/М-15/ нарын 4 бөх 9 даваатай башёг үргэлжлүүлж байгаа юм.
Өнөөдөр Ичиножёо
А.Ичинноров, Саданоүми /М-17/-г ёрикири мэхээр давж 9 даваа, 4 унаатай болсон
бол Кирибаяама Б.Лхагвасүрэн /М-8/, Тэрүцүоши/М-12/-г хатакикоми мэхээр
давснаар 7 даваа, 6 унаатай башёг үргэлжлүүлж байна.
Хошёорюү С.Бямбасүрэн
/М-14/, Шиманоүми /М-10/-тэй барилдан, түүнийг үчигаке мэхээр хаяж, 8 даваатай
болж, гачикоши буюу 50 хувийн амжилтаа хийлээ.
Мөн Сэкиваке Тэрүнофүжи
Г.Ган-Эрдэнэ, Эндо /М-5/-той барилдаж түүнийг ошидаши мэхээр давснаар 9 даваа 4
унаатай башёг үргэлжлүүлж байна. Харин Тамаваши Б.Мөнх-Оргил /М-4/, Комүсүби
Такаясүтэй барилдан, түүнд цүкидаши мэхээр ойчиж 8 унаатай болов.
Хацү башёгийн 13 дахь өдөр Озэки Шодай, Сэкиваке Таканошо-г хатакикоми мэхээр хаяж, 11 дахь даваагаа авсан бол Озэки Асанояама, Окиноүми /М-5/-г ёрикири мэхээр унагаж 9 даваа, 4 унаатай болов.
Маргааш Ичиножёо
А.Ичинноров, Такарафүжи /М-2/-тэй, Кирибаяама Б.Лхагвасүрэн /М-8/, Мидорифүжи /М-14/-тэй,
Хошёорюү С.Бямбасүрэн /М-14/, Тобизарюү /М-7/-тэй, Сэкиваке Тэрүнофүжи
Г.Ган-Эрдэнэ, Озэки Шодайтай барилдах бол Тамаваши Б.Мөнх-Оргил /М-4/, Дайэйшёо
/М-1/-той тус тус барилдана.