Улаанбаатар
Орон нутагт зам, давааны цасыг цэвэрлэсээр байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. Дархан, Өвөрхангай, Архангай аймгийн нутгаар өнөөдөр бага зэргийн цас орж, бусад нутгаар зам даваа саадгүй, цаг агаар тогтуун, авто замаар зорчих тээврийн хэрэгслийн хөдөлгөөн хэвийн үргэлжилж байна.
Тодруулбал, Дархан-Эрдэнэт чиглэлийн авто замд шар усны үер, үерийн аюулаас сэргийлж ус зайлуулах хоолойн амсрын цас, шороо, хогийг цэвэрлэж, Дархан-Сүхбаатар чиглэлийн авто замын 226-232 км-т зорчих хэсэг, хөвөөн дээр тогтсон цасыг зориулалтын машинаар шүүрдэж арилгав. Мөн, Мөрөн-Улиастай чиглэлийн 397-398 дахь километрт халиа тошин, халтиргаа гулгаа үүссэн хэсгийн замыг түр хааж, болзошгүй эрсдэлээс урьдчилан сэргийлэхээр туслах зам гаргаж байна.
Манхан-Булган чиглэлийн авто замын Бага улаан даваа, Бодончийн хавцалаас улсын хил хүртэлх авто замын цасыг хусаж, давс цацлаа. Ховд-Улаангом
чиглэлийн авто замын 21-23
км-т Буянт голын халиа тошин үүссэн хэсэгт уртасгасан цагаар хамгаалалтын
далангийн шороо нэмжээ.
Улаанбаатар-Өндөрхаан
чиглэлийн авто замын 292 км-т замын зорчих хэсэгт тогтсон цасыг авто ачигчаар цэвэрлэж, Өндөрхаан-Чойбалсан чиглэлийн авто замын
0-50 км-т, Өндөрхаан-Баруун Урт чиглэлийн
авто замын 60-66 км-т цас хусаж,
цасны машинаар цас цэвэрлэж
байгааг Зам тээврийн хөгжлийн төв ТӨҮГ-аас мэдээлэв.
