Улаанбаатар
Голууд үерлэж байгаа тул орон нутгийн замд болгоомжтой зорчихыг анхааруулав
МОНГОЛЫН МЭДЭЭ | НИЙГЭМ
Улаанбаатар, 2024 оны наймдугаар сарын 8 /МОНЦАМЭ/. Сүүлийн өдрүүдэд томоохон гол мөрнүүд үерлэж байгаа тул орон нутгийн замд сэрэмж болгоомжтой зорчихыг Зам, тээврийн яамнаас анхааруулж байна.
Тухайлбал, энэ сарын 6-ны өдрийн байдлаар Сэлэнгэ, Хараа, Орхон гол үертэй, Хэнтий, Дадал сум орчимд Онон голын усны түвшин өмнөх өдрийнхөөс 20-30 см нэмэгдсэн байна.
Мөн Босгийн гүүр-Улаанбаатар-Алтанбулаг болон Лүн сумын чиглэлд Туул гол үерийн аюултай түвшинг давжээ. Дорнод, Эрээнцав орчимд Эг, Улз гол, Хонгон-Чойбалсан чиглэлд Хэрлэн гол үерийн түвшинг 5-35 см давж, үерийн аюултай түвшинд хүрсэн байна.
Мөнгөнморьт-Багануур-Өндөрхаан чиглэлд Хурх, Барх, Онон, Балж, Хэрлэн гол үерлэсэн аж. Сэлэнгэ мөрөн, Орхон голын дунд болон адаг хэсгээр усны түвшин 5-20 см, Хэрлэн гол Өндөрхаан-Чойбалсан хот орчимд 5-15 см-ээр нэмэгдэхээр байгааг Цаг уур, орчны шинжилгээний газраас анхааруулав.
