Улаанбаатар
ДОРНОГОВЬ: Цацын булаг
ОРОН НУТГИЙН МЭДЭЭ | ДОРНОГОВЬ
Сайншанд, 2024 оны зургаадугаар сарын 26 /МОНЦАМЭ/. Дорноговь аймгийн байгаль болон түүхийн сонин тогтоц бүхий үзэсгэлэнт газруудын тухай цувралаар хүргэж байна.
Сайхандулаан сумын төвөөс арав хүрэхгүй км-т буй баруун, зүүн Цацын ам, Цацын булаг нь говийн экологийн тэнцвэрийг хадгалсан булаг устай, олон төрлийн ургамалтай, мал бэлчээрлэхэд тохиромжтой газар юм. Тус газрыг орон нутгийн хамгаалалтад авч байгалийн үзэсгэлэнт газрын нэгээр баталсан байдаг.
Говьд ургадаг цулхир, царван, зээргэнэ, шар мод, чихэр өвс, хөмүүл, таана зэрэг эмийн болон хүнсний ургамал ургахаас гадна ан амьтдаас аргаль, хулан, хар сүүлт, цагаан зээр, чоно, үнэг, шилүүс, дорго, туулай, жигүүртнээс тас, бүргэд, элээ, харцага, шаазгай, ногтруу, тогоруу, болжмор зэрэг нутгийн болон нүүдлийн шувууд элбэг байдаг.
Эл нутгийн орчимд эртний 40 гаруй хадны сүг зураг буй. Мөн Дорноговийн
аялал жуулчлалын томоохон төв Хамарын хийд, Ханбаянзүрх хайрхнаас Сайхандулаан-Сайншанд гэсэн аяллын маршрутад оруулах боломжтой аж.
