Улаанбаатар
ТӨВ: Политехник коллежийн суралцагчид ур чадвараараа өрсөлдөв
ОРОН НУТГИЙН МЭДЭЭ | ТӨВ
Зуунмод, 2024 оны арваннэгдүгээр сарын 5 /МОНЦАМЭ/. Аймгийн хэмжээнд үйл ажиллагаа явуулдаг Политехник коллежийн тогооч, гагнуурчин мэргэжлийн суралцагчдын дунд ур чадварын уралдааныг энэ сарын 4-ний өдөр зохион байгуулав.
Уралдааныг Төв аймгийн Эрдэнэ сум дахь Политехник коллежийг түшиглэн зохион байгуулсан бөгөөд Зуунмод сум дахь Политехник коллеж, Баянчандмань сум дахь Политехник коллеж, ХААИС-ийн харьяа Төв аймаг дахь Политехник коллеж, Эрдэнэ суман дахь Политехник коллежийн 15 суралцагч мэдлэг, ур чадвараа сорин өрсөлдсөн юм.
Гагнуурчин мэргэжлийн төрөлд тэргүүн байрыг Төв аймгийн Зуунмод сум дахь Политехник коллежийн суралцагч С.Галмандах эзэлсэн бол дэд байрт Төв аймгийн Баянчандмань сум дахь Политехник коллежийн суралцагч У.Шижирбат шалгарчээ.
Шагналт байр эзэлсэн сурагчид хэлэхдээ, “Гагнуурчин мэргэжлийг тийм ч олон хүн эзэмшдэггүй тул нандин санагддаг. Бидний хийж байгаа үйлдэл бүр нарийн байдаг учраас анхаарал их шаарддаг. Цаашдаа энэхүү мэргэжлээрээ ажиллаж, улам сайжрах болно" гэв.
Тогооч мэргэжлийн төрөлд тэргүүн байрыг Төв аймгийн Зуунмод сум дахь Политехник коллеж суралцагч А.Намнаанамжир эзэлсэн бол дэд байрт Төв аймгийн Зуунмод сум дахь Политехник коллежийн суралцагч С.Ган-Эрдэнэ нар тус тус шалгарлаа.
Ташрамд дурдахад, 2025 онд Эрдэнэ Политехник коллеж /хуучнаар
Архустайн сургууль комбинат/ үүсэн байгуулагдсаны 70 жилийн ой тохионо.
Холбоотой мэдээ
