Улаанбаатар
Украины нутгаар Оросын хийг дамжуулахыг зогсоожээ
ДЭЛХИЙН МЭДЭЭ | УЛС ТӨР
КИЕВ, 2025 оны нэгдүгээр сарын 2 /VOA/. Украины тал нутаг дэвсгэрээр нь дамжин өнгөрдөг Оросын байгалийн хийн тээвэрлэлтийг түр зогсоосноо зарлаж, эл шийдвэрээ "үндэсний аюулгүй байдлын ашиг сонирхлоос үүдэлтэй түүхэн үйл явдал" хэмээн мэдэгджээ.
“Орос зах зээлээ алдаж байна, тус улс санхүүгийн алдагдал хүлээх болно. Европын орнууд Оросын хийнээс татгалзах шийдвэрээ аль хэдийн гаргасан. Мөн Европын “Repower EU” санаачилгад Украины хийж буй алхмыг тусгасан байгаа” гэж Украины Эрчим хүчний сайд Герман Галущенко цохон дурдсан байна.
Лхагва гаргийн өглөө Украины Эрчим хүчний яамны цахим хуудсанд нийтэлсэн мэдэгдэлд, хийн тээврийн системийн дэд бүтцийн дамжин өнгөрөх хэсгийг тэг горимд ажиллуулж, Украины хэрэглэгчдэд хий нийлүүлэхийн тулд урьдчилан бэлтгэсэн гэж дурджээ.
Харин Оросын “Газпром” компани нэгдүгээр сарын 1-нд мэдэгдэхдээ, дамжин өнгөрөх хийн нийлүүлэлт техникийн болон хууль эрх зүйн боломжоос шалтгаалан зогссон гэлээ. "Москвагийн цагаар өглөөний 8:00 цагаас эхлэн Украины нутаг дэвсгэрээр дамжуулан тээвэрлэдэг Оросын хийн нийлүүлэлт зогссон" гэж тус компани Telegram сувагт мэдээлжээ.
“Уренгой-Помара-Ужгород” хий дамжуулах хоолойгоор Тюмений ордоос олборлосон хийг Курск мужаас Украины нутаг дэвсгэрээр дамжуулан нийлүүлж байв. Уг хоолой нь Украины нутаг дэвсгэрээр дамжин Словак руу нэвтэрч, дараа нь хоёр салаалдаг байна.
Украины нутгаар дамжин өнгөрдөг байгалийн хийн нийлүүлэлтийг зогсоосны улмаас олон улсад хүлээн зөвшөөрөгдөөгүй Приднестровийн Молдовагийн Бүгд Найрамдах Улсад халаалт, халуун усны хангамжийг зогсоосон тухай мэдээлэл гарсан байна.
Приднестровье нь Зөвлөлт Холбоот Улс задран унаснаас хойш Оросыг дэмжигч хүчний хяналтад байгаа боловч энэ бүс нутгийг Молдова улсын нутаг гэж тооцдог.
