Биокомбинатыг шинэчлэх 57 сая ам.долларын төслийн гэрээнд гарын үсэг зурлаа

Монголын мэдээ | ГХЯ-ны мэдээ
nandintsetseg@montsame.gov.mn
2020-04-30 17:32:56
NandiaMontsame

Улаанбаатар /МОНЦАМЭ/. Гадаад харилцааны сайд Д.Цогтбаатар, ХХААХҮ-ийн сайд Ч.Улаан нар Унгарын Гадаад эдийн засаг, Гадаад хэргийн сайд Питер Сияртотой 4 сарын 30-нд цахим хурал хийлээ.


Хурлын эхэнд Монгол Улсын Сангийн яам, Унгар Улсын Экспорт-Импорт (ЭКСИМ) банк хоорондын Биокомбинатыг шинэчлэх 57 сая ам.долларын зээлийн хэлэлцээрт Монгол Улсаас Унгар Улсад суугаа Элчин сайд З.Батбаяр, ЭКСИМ банкны Ерөнхий захирал Гергей Якли нар гарын үсэг зурав. 17,5 жилийн хугацаатай нэн хөнгөлөлттэй энэхүү зээл нь хүүгүй бөгөөд үндсэн зээлийн төлбөрөөс эхний дөрвөн жил чөлөөлөгдөх юм.


Монгол, Унгарын хооронд дипломат харилцаа тогтоосны 70 жилийн ой 2020 оны 4 дүгээр сарын 28-ны өдөр тохиосонтой холбогдуулан сайд нар баяр хүргэж, хоёр улсын харилцаа, хамтын ажиллагаа цаашид улам өргөжин хөгжинө гэдэгт итгэлтэй буйгаа илэрхийлэв.


Гадаад харилцааны сайд Д.Цогтбаатар Сонгино дахь “Биокомбинат” УТҮГ-ыг шинэчлэх төсөл хэрэгжихэд бэлэн болж байгаад баяртай буйгаа илэрхийлж, тус төслийн ач холбогдлыг онцлон тэмдэглэв. Монгол, Унгарын 70 жилийн дипломат харилцаанд тулгуурлан хоёр орны хамтын ажиллагааг худалдаа, эдийн засаг, хөдөө аж ахуй зэрэг салбарт түлхүү хөгжүүлэх сонирхлоо илэрхийлэв.


Усны менежментийг сайжруулах замаар манай улсын хөдөө аж ахуйн салбарыг хөгжүүлэх, мөн тус салбарын логистикийн сүлжээг хөгжүүлэх чиглэлээр хамтарсан төсөл хэрэгжүүлэх манай саналыг унгарын тал дэмжиж буйгаа илэрхийлж, өнөөгийн нөхцөл байдалтай уялдуулан холбогдох албаны төлөөлөгчдийг цахим хэлбэрээр уулзуулах нь зүйтэй гэдэгт сайд нар санал нэгдэв.


НҮБ болон олон улсын бусад байгууллагын хүрээнд манай хоёр улс харилцан дэмжлэг үзүүлж ирснийг тэмдэглээд олон улсын байгууллагын сонгуульд Монгол Улсаас нэр дэвшүүлсэн төлөөлөгчдийг дэмжиж буйгаа Унгарын Гадаад хэрэг, худалдааны сайд П.Сияяарто илэрхийлэв. Түүнчлэн Гадаад харилцааны сайд нарын өмнөх уулзалтын үеэр яригдсан хил дамнасан хууль бус наймаа, гэмт хэрэгтэй тэмцэх, энэ чиглэлээрх манай хүчин чармайлтыг бүрэн дэмжиж буйгаа унгар талаас илэрхийлж, хоёр улсын хууль сахиулах байгууллага хооронд шууд холбоо тогтоохоор тохиров.


Унгарын Унгарын их, дээд сургуульд суралцуулах тус улсын Засгийн газраас манайд олгодог 200 оюутны тэтгэлгийг ирэх жилүүдэд үргэлжлүүлэн олгохоо Унгарын тал нотолж, хоёр улсын Дипломат академи хоорондын хамтын ажиллагааг эхлүүлж, Унгарын туршлагаас суралцахаар болов.



Холбоотой мэдээ