Дулааны аргаар боловсруулах технологийн горим зөрчиж бэлтгэсэн 0.8 тонн махыг устгалаа

МОНГОЛЫН МЭДЭЭ | ХУУЛЬ
oyundelger@montsame.gov.mn
2022-11-10 15:30:32

Улаанбаатар /МОНЦАМЭ/. “Өлзийт тал” ХХК-ийн дулааны аргаар бэлтгэсэн 0.8 тонн ямааны махыг нянгийн хэмжээ хэтэрсэн үндэслэлээр Улаанчулуутын хогийн цэг дээр НЗДТГ, Мэргэжлийн хяналтын байгууллагынхан устгалаа.

Тус компани нь дотооддоо мах махан бүтээгдэхүүн нийлүүлдэггүй бөгөөд зөвхөн экспортод гаргадаг.


НМХГ-ын мэргэжилтнүүд 6 дугаар сард “Өлзийт тал” ХХК-д хийсэн шалгалтаар экспортлохоор дулааны аргаар бэлтгэсэн чанарын шаардлага хангаагүй 0.8 тонн ямааны махыг илрүүлж, Улсын мал эмнэлэг, ариун цэврийн төв лабораторид шилжүүлсэн. Улмаар тухайн боловсруулсан маханд нянгийн хэмжээ их, хүнсэнд болон дахин боловсруулж хэрэглэх боломжгүй гэсэн дүгнэлт гаргажээ.



Засгийн газрын 5 дугаар сарын 31-ний хуралдаанаар “Мах махан бүтээгдэхүүний үйлдвэрлэл, нийлүүлэлт, экспортын үйл ажиллагаанд хяналт, шалгалт, эрсдэлийн үнэлгээ хийх, хяналтын тогтолцоог боловсронгуй болгох, цаашид авах арга хэмжээний талаар санал боловсруулах” үүрэг бүхий Ажлын хэсгийг Шадар сайдаар ахлуулан байгуулсан юм. Энэ хүрээнд Шадар сайд С.Амарсайхан мах, махан бүтээгдэхүүн үйлдвэрлэх, экспортлох үйл ажиллагаа явуулдаг байгууллагуудад шат дараатай шалгалт хийж, эрүүл ахуй, хүнсний аюулгүй байдлын улсын стандарт, норм дүрмийг сахиулж ажиллахыг МХЕГ-ын дарга Б.Баасандоржид үүрэг болгосон билээ.

 

Холбоотой мэдээ