Улаанбаатар
“Автомашингүй гудамж” төслийг зарим иргэн эсэргүүцэж, ажлыг нь тасалдуулжээ
МОНГОЛЫН МЭДЭЭ | НИЙГЭМУлаанбаатар /МОНЦАМЭ/. Сүхбаатар дүүргийн 4 дүгээр хороо, Хичээнгүй сайд Б.Цэрэндоржийн гудамж буюу Их дэлгүүрээс АСА цирк хүртэлх цэцэрлэгт талбайг шинээр тохижуулах ажил албан ёсоор эхлээд буй .
Тус хорооны оршин суугчид өнөөдөр Нийслэлийн ЗДТГ, хувийн хэвшил болон мэргэжлийн ТББ, холбоод хамтран хэрэгжүүлж буй “Автомашингүй гудамж” төслийг эсэргүүцэн цуглаан зохион байгууллаа. Иргэд гүйцэтгэгчээр ажиллаж буй “Бүти” компанийн үйл ажиллагааг эсэргүүцэн хашааг буулгаж, ажлыг нь тасалдуулжээ.
Иргэн Д.Батсүх: 40, 50 мянгатын өргөн чөлөөнд иргэдийн зөвшөөрөлгүй, хүчээр хашаа бариад, зүлэг мод, ногоон байгууламжийг нь эвдэж байна. Энд ямар ч гоё газар байгуулах хэрэггүй. Жирийн иргэн байрныхаа дунд ТҮЦ барих гэхэд Нийслэлийн Захирагчийн ажлын алба, тухайн СӨХ-өөс зөвшөөрөл авах зэргээр маш олон бичиг баримт бүрдүүлдэг. Гэтэл ард иргэдтэй зөвлөхгүйгээр нийслэлийн зүрх болсон энэ сайхан газарт барилгын ажил эхэлж байгааг эсэргүүцэж байна. Энэ бол ард иргэдийн хүчтэй тэмцэл. Сумын төвийнхөн ч гэсэн сумынхаа нутаг дэвсгэрт алт ухуулахгүй, төнхүүлэхгүй гэдэг. Эх орныхоо зүрх болсон энэ газрыг нийслэлчүүд ухуулахгүй, харин тохижуулна. Энэ газрыг эвдсэн компаниар заавал буцааж хэвэнд нь оруулна.
Сүхбаатар дүүргийн I хорооны иргэн Р.Даваа: Манайх анх 1959 онд 40 мянгатад нүүж ирсэн. Энэ талбайд миний эмээ өвөө, ээж аав амьдарч, би ач нартайгаа зугаалж, амралтын цагаа өнгөрөөдөг газар нутаг. Энд цугласан иргэд хашааг буулгаж, замыг хаая гэсэн. Ингэж олон нийтийн анхаарлыг татаж, иргэний нийгэм байхгүй, иргэнээ хүндэтгэдэггүй учир иргэд сайн дураар цуглаад байна. Олон 10 жил байсан унаган төрхөөр нь байлгах нь бидэнд хэрэгтэй.
Иргэд энэ үеэр оршин суугчдын гарын үсгийг цуглуулж дараагийн шатны байгууллагад хандахаа илэрхийлж байлаа.
Энэхүү гудамжны газар доор олон нийтэд зориулсан амрах талбайтай, худалдаа, үйлдвэрлэл үйлчилгээ бүхий явган зам, орчин үеийн шийдэл бүхий гэрэлтүүлэгтэй ногоон байгуулж байгуулах аж.
Үүнтэй холбоотой нийслэлийн Хот төлөвлөлт, ерөнхий төлөвлөгөөний газрын орлогч дарга Ш.Уртнасан “Автомашингүй гудамж” төслийн талаар ингэж ярилаа.
-“Автомашингүй гудамж” төслийг хэрэгжүүлж эхлээд байна. Энэ талаар тодорхой мэдээлэл өгнө үү?
-Сүхбаатар дүүргийн 4 дүгээр хороо, хичээнгүй сайд Б.Цэрэндоржийн гудамжны газар доорх үйлчилгээ бүхий тохижилтыг хийх ажил албан ёсоор эхлээд байна. Тохижилт хийх газрыг 2016 онд олгосон бөгөөд мэргэжлийн зөвлөлөөр хэлэлцүүлж “Автомашингүй гудамж” төсөл болгон хэрэгжүүлэх нь зүйтэй юм байна гэсэн дүгнэлтэд хүрсэн. Улмаар Улаанбаатар хотын автозамын түгжрэл, иргэдийн амгалан тайван зорчих боломж нөхцөлийг хангах үүднээс олон улсын томоохон хотуудад хийгддэг төслийн жишгээр уг ажлыг хийхээр болсон юм. Ажлын зураг төслийг 2017 онд баталсан. Нийслэлийн Засаг даргын Тамгын газар, Монголын үндэсний барилгын ассоциацитай хамтарч байгаа. Хотын төв хэсэгт орчин үеийн жишигт нийцсэн газар доорх тохижилттой, иргэд, жуулчдын ая тухыг хангасан орчин бий болох юм.
-Төсөл хэрэгжиж дуусахад түүхийн дурсгалт зүйл болох хөшөөнүүдийг эргэж тавих уу?
-Тэгэлгүй яахав. Зураг төслийн дагуу Хичээнгүй сайд Б.Цэрэндоржийн гудамжид байгаа хөшөө дурсгалуудыг байршилд нь хэвээр үлдээнэ. Тодруулж хэлбэл, зураг төслийн дагуу одоо байгаа газрын түвшин, хэмжээ, тохижилт хэвээр байхаар газар доорх тохижилтын ажил хийгдэнэ. Тус гудамжинд 1 усан оргилуур, 2 хөшөө байдаг. Хөшөө дурсгалыг түүхийн дурсгалт зүйл гэдэг утгаар нь хадгалж үлдэнэ. Усан оргилуур, ногоон байгууламжийг төлөвлөлтийн зураглалын дагуу илүү сайжруулж хийнэ. Үүнийг иргэд ойлгох хэрэгтэй. Иргэд Шөнийн гудамжийг эхлээд шүүмжилж байсан ч одоо нэмэлт тохижилт хийснээр иргэдийн талархлыг хүлээсэн газрын нэг болоод байгаа.
-Газар доорх үйлчилгээний байгууламжийн ажил хэр хугацаанд хийгдэх вэ?
-Уг ажлыг үе шаттайгаар хийж гүйцэтгэнэ. Эхний ээлжийн тохижилтын ажлыг ирэх арваннэгдүгээр сард дуусгахаар төлөвлөсөн. Төслийг 1-2 жилийн дотор хийж дуусгах төлөвлөгөөтэй байгаа. Газар доорх 2 давхар байгууламж гэдэг нь инженерийн тооцоололтой нэлээн том ажил. Тиймээс тодорхой хугацаа зарцуулагдах нь ойлгомжтой. Аса циркийн хойно Сөүлийн гудамжнаас Их дэлгүүр урд талын уулзвар хүртэлх талбайг төслийн хүрээнд тохижуулна.
Иргэд Автомашингүй гудамж гэхээр ямарч машин явуулахгүй болгоод түгжрэл нэмэгдэнэ гэж ойлгоод байх шиг байна. Өдрийн цагаар тус гудамжинд автомашин чөлөөтэй зорчино. Тодорхой цаг хугацаанд иргэдийн тав тухыг хангах зорилгоор хааж чөлөөт цагаа зөв боловсон өнгөрүүлэх боломжийг олгох гэж байгаа юм.
-Энэ төслийг хэрэгжүүлж буй Монголын барилгын үндэсний ассоциацийн талаар мэдээлэл өгнө үү?
-“Автомашингүй гудамж” төслийн санаа 2014 оноос эхлэн яригдаж эхэлсэн юм. Тухайн үед хувийн хэвшлүүдээс олон санаа гарч байсан боловч Улаанбаатар хотын маань нүүр царай болсон энэхүү гудамжийг тохижуулах төсөлд хариуцлагатай, нэр хүндтэй байгууллага оролцох шаардлагатай гэдэг үүднээс шийдэгдээгүй байсан. Төслийн хэрэгжүүлэгч байгууллага бол Монголын барилгын үндэсний ассоциаци. Монголын барилгын үндэсний ассоциаци нь барилгын салбарт үйл ажиллагаа явуулдаг 150 гаруй аж ахуйн нэгжүүдийг гишүүнчлэлдээ багтаасан барилгын салбарын хамгийн том нэр хүнд бүхий байгууллага байдаг. Энэ төсөлд шаардагдах бүх хөрөнгө оруулалтыг төсөл хэрэгжүүлэгч буюу Монголын барилгын үндэсний ассоциаци хариуцаж байгаа. Төслийг хэрэгжүүлэхэд нийслэлээс нэг төгрөг ч гарахгүйгээр хийгдэж байгаа гэдгийг онцлон хэлмээр байна.
Ж.Болор
