Улаанбаатар
АСЕАН-ы дээд хэмжээний уулзалтыг хойшлуулжээ
ДЭЛХИЙН МЭДЭЭ | УЛС ТӨР
ХАНОЙ. /Kyodo/.
Вьетнамд ирэх дөрөвдүгээр сард
зохион байгуулахаар төлөвлөж байсан Зүүн Өмнөд Азийн орнуудын холбооны
/АСЕАН/ удирдагчдын дээд хэмжээний уулзалтыг зургадугаар
сарын сүүл хүртэл хойшлуулахаар болсон гэж дипломат эх сурвалж пүрэв гарагт
мэдээлжээ.
АСЕАН-ы
удирдагчдын энэ удаагийн уулзалтыг Вьетнамын Дананг хотын далайн
эргийн амралтын газарт зохион байгуулахаар төлөвлөж байжээ. Гэсэн хэдий ч
Зүүн Өмнөд Азийн орнуудад шинэ коронавирусний халдварын тархалтыг хязгаарлахын
тулд яаралтай арга хэмжээнүүдийг хэрэгжүүлж байгаа тул уг дээд хэмжээний уулзалтыг хойшлуулах магадлал өндөр байсан аж.
АНУ-ын Лас-Вегас
хотноо энэ сарын дундуур зохион байгуулахаар товлосон АНУ-АСЕАН-ы дээд
хэмжээний уулзалтыг мөн халдварын тархалтын улмаас хойшлуулсан юм. АСЕАН-ы
бүрэлдэхүүнд Бруней, Камбож, Индонез, Лаос, Малайз,
Мьянмар, Филиппин, Сингапур, Тайланд, Вьетнам багтдаг.
