Улаанбаатар
Манлайллын хөтөлбөрт 200 эмэгтэйг хамруулж чадавхжуулна
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 2 /МОНЦАМЭ/. Азийн эмэгтэйчүүдийн манлайллын хөтөлбөрийн сургалт өнөөдөр эхэллээ.
Энэхүү сургалтыг Жендэрийн үндэсний хорооноос
санаачлан гурав дахь жилдээ хэрэгжүүлж, Азийн хөгжлийн банктай хамтран зохион байгуулж
байгаа бөгөөд 21 аймгийн удирдах албан тушаалд ажиллаж буй 25 эмэгтэй хамрагдаж
байна.
Манлайллын хөтөлбөр нь “Алсын хараа-2050” урт хугацааны хөгжлийн зорилт, жендэрийн тэгш бус байдлыг бууруулахад хувь нэмэр оруулахын зэрэгцээ эмэгтэй манлайлагчдын итгэл төгс ярих, харилцах, анхаарлаа төвлөрүүлэх, хэвлэл мэдээлэлтэй харьцах, асуултад оновчтой хариулах, төвөгтэй асуултад бэлэн байх, мэдээллийг олон нийтэд хүргэх, өөрийн болон хамт олон, нийгмийн төлөө өөрчлөлт хийх асуудлаар хэлэлцэх ур чадварыг дээшлүүлэхэд чухал нөлөө үзүүлэх ажээ.
Сургалтаар Монгол Улсын эрүүл мэнд, боловсрол, эдийн засаг, улс төр зэрэг салбарт жендэрийн тэгш бус байдал олон улсын болон бүс нутгийн нөхцөл байдалтай харьцуулахад ямар түвшинд байгаа талаар ойлголттой болох, уур амьсгалын сорилтод жендэрийн мэдрэмжтэй шийдлийг чухалчилж буйг онцолж байна. Мөн уур амьсгалын өөрчлөлтийн эсрэг бодлогын нөлөөлөл дэх эмэгтэй манлайлагчдын хүчирхэгжүүлэх, олон нийтийг уур амьсгалын өөрчлөлтөд дасан зохицоход нь тогтвортойгоор манлайлахад шаардлагатай ур чадварыг эмэгтэй манлайлагчдад мэдлэг, туршлага, стратегийн арга барил зэргээр хуваалцах аж.
Жендэрийн үндэсний хорооны нарийн бичгийн
дарга бөгөөд ажлын албаны дарга Т.Энхбаяр ярихдаа, “Энэхүү хөтөлбөрийг анх 2023 онд
жендэрийн үндэсний хороонд нутагшуулж өнөөгийн байдлаар салбарын 16 яам, хувийн
хэвшил, төрийн бус байгууллагыг оролцуулж, 100 эмэгтэйг манлайллын хөтөлбөрөөр
сургаж байна. Шийдвэр гаргах үйл явцад эмэгтэйчүүд давамгайлж байгаа тохиолдолд тэд эрэгтэйчүүдтэй хэлэлцээрийг хэрхэн хийх талаар тогтвортой байдлыг хангах нь чухал юм. Мөн 2026 оныг
дуустал удирдах түвшний 200 эмэгтэйг улсын хэмжээнд бэлтгэх төлөвлөгөөтэй ажиллаж байгаа” гэв.
Сургалт хоёр өдөр үргэлжилнэ.
