Улаанбаатар
Оройн цагаар одод болон сар дурандаарай
МОНГОЛЫН МЭДЭЭ | НИЙГЭМ
Улаанбаатар, 2023 оны аравдугаар сарын 5 /МОНЦАМЭ/. “Дэлхийн сансрын 7 хоног-2023” хоёр дахь өдрөө “Зайсан хилл” дэх “Дүдү” танин мэдэхүйн музейд үргэлжилж байна.
World Space Week нь
дэлхийн 90 гаруй улсад нэгэн зэрэг зохион байгуулдаг шинжлэх ухаан, технологийн
олон улсын томоохон наадам юм. Эцэг, эхчүүд хүүхдүүдтэйгээ цагийг зугаатай, бүтээлч өнгөрүүлэхэд
хамгийн тохиромжтой нь “Дэлхийн сансрын 7 хоног”.
Тус арга хэмжээ нь хүүхэд багачуудад шинжлэх ухаан, сансар огторгуй судлалаас
бий болдог өндөр технологи, ашиг тусыг таниулахаас гадна түүнд сонирхолтой болгох зорилготой.
Энэ үеэр сансар судлалтай холбоотой үзэсгэлэнг олон нийтэд үнэ төлбөргүй үзүүлж байгаа юм. Мөн сансрын шинжлэх ухааны талаарх хамгийн сонирхолтой номууд, сансрын холбогдолтой бэлэг дурсгалын зүйлсийг сонирхож, худалдан авч болох аж. Одон орон, гараг ертөнц, галактик сонирхогчид сансрын долоо хоногийн хөтөлбөрийн хүрээнд өдөр бүр 21:30-23:00 цагийн хооронд шилэн гүүрний хэсгээс одод болон сар дурандах боломжтой.
Зохион байгуулагчид “Сансрын долоо хоногоор энгийн нэг
үзэсгэлэн үзэх биш, бүх зүйлийг гар бие оролцон туршиж, хийж үзэх боломжтой. Тиймээс ЕБС-ийн анги хамт олон,
гэр бүл, найз нөхдөөрөө зорин ирж оролцоосой гэж хүсэж байна. Ялангуяа ЕБС-иуд нэг цагийн хичээлээ энд ирж бодитоор
хийгээсэй” хэмээн ярилаа.
