Ялгадсаараа "амьсгалдаг" их хотынхон

Монголын мэдээ | Нийгэм
khandmaa@montsame.gov.mn
2021-10-28 14:50:22

Улаанбаатар /МОНЦАМЭ/.  Хүний  эрүүл мэндэд шууд нөлөөлдөг хөрсний бохирдол гэж юу вэ? хөрсний бохирдолд хүн бүр яагаад анхаарлаа хандуулах ёстой вэ? гэдэг энгийн юм шиг хирнээ чухал ач холбогдолтой асуултанд хариулах гэж оролдоё.

 

         Хөрс бохирдуулагч  нүхэн жорлон нэмэгдсээр ...

 

Аймгийн төв болон нийслэлийг чиглэх шилжилт хөдөлгөөн тасралтгүй үргэлжилсээр байна.  Үүний  үр дүнд төв суурин газруудын  дэд бүтцийн хүртээмж муу, төвлөрсөн цахилгаан дулаан хангамжид холбогдоогүй, стандартын бус нүхэн жорлон, ахуйн зуух бүхий айл өрхийн тоо жилээс жилд нэмэгдсээр байна. 

Хамгийн сүүлийн статистик сөхвөл 2020 онд  хийгдсэн судалгааны дүнгээр Монгол Улсад шаардлага хангасан 333.560 ариун цэврийн байгууламж, шаардлага хангаагүй 442.344 жорлон байна гэсэн тоо гарсан.  Энэ дүнгээс харахад манай улсын нийт хүн амын 63 хувь нь стандартад нийцээгүй ариун цэврийн байгууламж хэрэглэж байна гэсэн үг. Гэр хороололд суурьшиж байгаа  айл өрхийн нүхэн жорлон бүр нь хөрсний нянгийн бохирдол үүсэх гол шалтгаан болдог юм. Энэ хирээр  гүний болон гадаргын ус, хөрсний бохирдлын гол эх үүсвэр, халдварт өвчин дэгдэх суурь нөхцөл болж байна. Улаанбаатар хотын хувьд гэр хорооллын 200 мянга гаруй өрхийн ариун цэврийн байгууламжийн 80 хувь нь стандартад нийцэхгүй байна.Cаяхан нийслэлийн долоон дүүргийн хэмжээнд 144.992 нүхэн жорлон тоологдлоо.